პირველი ინტერაქტიული და სამეცნიერო მუზეუმი „ექსპერიმენტორიუმი“ თბილისში 2016 წლის 1 ოქტომბერს გაიხსნა. მისი შექმნის იდეა თავიდანვე ეფუძნებოდა რწმენას, რომ მეცნიერება უნდა იყოს ხელმისაწვდომი, გასაგები და საინტერესო ყველასთვის - ასაკის, წინასწარი ცოდნისა თუ გამოცდილების მიუხედავად.

მუზეუმში წარმოდგენილია 60-მდე ინტერაქტიული ექსპონატი, რომლებიც ვიზუალურად და პრაქტიკულად აჩვენებენ ფიზიკის ძირითად კანონებს. აქ ექსპონატებთან შეხება არა მხოლოდ ნებადართულია, არამედ აუცილებელიცაა - რადგან სწავლა ხდება დაკვირვებითა და ცოცხალი გამოცდილებით.

ფიზიკის ექსპოზიციასთან ერთად, ექსპერიმენტორიუმში ფუნქციონირებს ქიმიის ლაბორატორია, სადაც ქიმიური ცდები ტარდება მარტივი, უსაფრთხო და სახალისო ფორმით. ქიმიის პროგრამებიც ინტერაქტიულია და მიმართულია იმისკენ, რომ ბავშვებსა და მოზარდებს მეცნიერების მიმართ შიში ჩაენაცვლოთ ინტერესითა და ცნობისმოყვარეობით.

ექსპერიმენტორიუმი თავიდანვე არ შემოიფარგლა მხოლოდ საგამოფენო სივრცით. მუზეუმში ტარდება საგანმანათლებლო პროგრამები ბაღისა და სკოლის მოსწავლეებისთვის, თემატური მეცნიერების საათები, ვორქშოფები და სპეციალური აქტივობები, რომლებიც ხელს უწყობს STEM მიმართულებების პოპულარიზაციას და კრიტიკული აზროვნების განვითარებას.

დღეს ექსპერიმენტორიუმი ასევე წარმოადგენს სივრცეს დაბადების დღეების, კორპორატიული და საგანმანათლებლო ღონისძიებების ჩასატარებლად, ხოლო გასვლითი სამეცნიერო პროგრამების მეშვეობით მუზეუმს მეცნიერება საქართველოს სხვადასხვა რეგიონშიც მიაქვს.

წლების განმავლობაში ექსპერიმენტორიუმი ჩამოყალიბდა როგორც ადგილი, სადაც მეცნიერება აღარ არის აბსტრაქტული თეორია, არამედ არის ცოცხალი გამოცდილება - ადგილი, რომელიც აერთიანებს სწავლას, აღმოჩენას და საზოგადოებას.